O Banco de Leite Materno está adscrito á Unidade de Neonatoloxía da Xerencia de Xestión Integrada de Santiago e é a unidade encargada de recoller, procesar, almacenar e distribuír leite materno doado de forma altruísta por aquelas nais que así o desexan, para beneficio dos recentemente nados que a necesiten e que a obteñen tamén de forma gratuíta.
Ubícase no Hospital Clínico Universitario de Santiago e nace cos seguintes obxectivos:
- Proporcionar leite materno aos pacientes da Área de Neonatoloxía desta Xerencia que circunstancialmente non poidan obtela das súas propias nais.
- Proporcionar leite materno a outros Hospitais do ámbito sanitario/Comunidade Autónoma que así o soliciten.
- Proporcionar leite materno a outros pacientes de características especiais nos que se demostrou o beneficio da lactación materna. O leite materno de banco fóra do período neonatal está indicado nas seguintes situacións:
- Déficit de IgA e Alerxias
- Tratamento do fallo de medro
- Tratamento na insuficiencia renal
- Tratamento de Erros Conxénitos do Metabolismo
- HIV materno
- Fomentar a lactación materna a nivel hospitalario e o perfeccionamento das técnicas que colaboran no mantemento da lactación, como a expresión do leite ou a súa conservación para a alimentación dos recentemente nacidos. A experiencia noutros países demostrou que a instauración dun Banco de Leite materno aumenta as taxas de lactación materna na rexión onde se implantou.